EPISODE 1 – PHILIPPINES

T’at’ı̨ghą Hǫdı́

EPISODE 1

PHILIPPINES

T’a Yë́ghą Ërı̨tł’ı́s hël T’a Bë Dá Ghárë, Randy Kelly

Shë́th cho háyórı̨la, Northern Phıllıppınes k’ë́yaghë hots’ı̨, Wang Od Oggay, hanı́së tthá hots’ı̨ bëlot’ınë́ k’ë́së́ dënë tth’ı̨ k’erë́tł’ı́së k’ënádhër, ts’ëkwı chu Kalınga ëłáts’ë́lghël dë́në́ básǫrë́lnı̨ há, bëtth’ı̨ k’ë nı́lye nı̨́sı̨́ dųë́ dënë k’ë nı́lé. Whang Od, dųë́ k’ásjë́n ı̨łághë bë́schë́në́ bë́ghé, bą́zë chu dënë hádónë́łtë́n dënë tth’ı̨ k’erë́tł’ı́së ghą, t’o áh hǫlánı̨ në́në́ há bëk’áts’ëdé wálı̨ há.

Dënë Bëghą Hǫnı̨́

Whang Od Oggay

Whang Od Oggay, dënë tth’ı̨ k’erë́tł’ı́së k’enádhër, mambatok, húlye, Buscalan, Kalınga hots’ı̨. Ët’ekásë hë́lı̨ hų́, dënë tth’ı̨ k’erë́tł’ı́së hǫ́nı́łthë́r nı̨, t’o Kalınga dë́në́ ëłë́ts’ë́ghál k’ënádé nı̨́sı̨́ Phıllıppınes k’ë́yaghë. Dų dzı́në́ k’ë́, Whang Od, ëłų dënë tth’ı̨ k’erë́tł’ı́së k’ë́nádhër shë́th cho yaghë háyorı̨la hots’ı̨. Ëdı̨në́ chu bázë́ łą lı̨mı́l hanë́łt’ë dënë tth’ı̨ k’edárı̨tł’ı́s. T’a bëk’ë́në́ hǫnı̨ sı̨́, Grace Palıcas bëghą, tonë́na ts’ë́n łághë bëghe. Whang Od bą́zë dënë tth’ı̨ k’erë́tł’ı́së dë́në́ hë́lı̨ ttherë́ húlta Buscalan k’ë́yághë.

Grace Palicas

Grace Palıcas, Buscalan, në́yą. Whang Od bázë́ hë́lı̨, dënë tth’ı̨ k’erë́tł’ı́së nárë́ në́yą. Ąłnë́dhë hënë́łı̨ hų́, Grace, Buscalan ch’ásë hë́ya sëkwı̨ hónë́ltë́nı̨ hë́lı̨ há. Kólë́, dënë tth’ı̨ k’erë́tł’ı́së húgór ts’ı̨ layúë́ t’a bąk’ı̨ë́ t’orë́łɂá sı̨ ká ąneɂá hájá. Ëyërɂú yënë́rë́nı́ hájá dënë tth’ı̨ k’erë́tł’ı́së hë́lts’ı̨ há nók’ë́nı̨ya, ëyı̨ áh Buscalan nı̨ją Whang Od háyonë́łtë́n há. Dų dzı́në́ k’ë́, Grace, Whang Od, hǫtı́ë́ háyǫnë́łta, t’o áh hanë́dhë́ dé ëłų Kalınga ts’ı̨ dë́në́ tth’ı̨ k’erë́tł’ı́së k’ënáts’ë́dé há.